هرنه واریدی صداقتیدیر
بو گونلر آذربایجانین میللی قییام لارینین ایل دؤنومودور، گئچن ایل بو زامانلار گؤن به گؤن میللی دویغو منده جانلانیردی، دا ائله یئره یئتمیش دی هر نه ییین کی اوستونده آذربایجانین آدی گئدیردی منی ایلگیلندیریردی. آذربایجانین حاکمیت آداملاریدا منه یاخشی حیس وئریردیلر، البت ائله بو آداملار میللتین اوستونه گولله آچدیلار و بیزلری حبسه سالیب، ایشکنجه وئردیلر. آنجاق منه ماراقلیسی بودور کی ائله بونلاردا یئری گلدیکده بیزه قوشولاجاقلار. مجبوریت حالیندا بیزه قوشولاجاق لار.
هرنه واریدی صداقتیدیر. بوتون اینسانلاردان صداقت یاغیردی. بلکه تکجه زامانلاریدیر کی هئچ بیرکس شخصی منفعتین میللتین منفعتینه اوستون توتموردور. ائله اونا گؤره ده بو تاریخین زنگین نوقطه لریندن بیریسی یاراندی.
بیر میللتین بیر اؤزه ل گونلری اولار کی هامی اونو اؤزونونکو بیلر. ائله بودا او گونلردن دیر.
بیرینجی کز آذربایجان میللتی اؤزونه گؤره، تکجه اؤزونه گؤره، اؤز کیملی یینه گؤره، کیملی یینی قوروماق اوچون، اؤزگورلویو اؤچون، هئچ بیر اینحرافی دؤشونجه یه باغلانمادان وارلیغی نی بوتون دونیانین قولاغینا چاتدیردی، هئچ کیم سوسوب و سوسدورا بیلمه دی.
آذربایجان اؤزو اؤچون سیلکه لندی و بوتون منطقه نی سیلکه لدی.
هئچ کیم دییه بیلمز بو بیر یئره باغلی دیر، نییه کی هئچ بیر التقاطی دوشونجه میللتی بیر یئره ییغا بیلمزدی، او گوندن بری میللت هر ندن چوخ اؤز میللی منافعلرین دوشونه بیلیب لر.
میللت ائله ۵۰۰۰لر یاییلاندا اؤزلری قارشیلیق گؤستردیلر، بیز تکجه باخدیق.
من اینانیرام کی بو میللت اؤزگور بیر میللت اولماقا حاضیرلیق گؤرور، بوتون داورانیش لاریدا مدنی چرچیوه سینده دی، ائله اونا گؤره ده حاکمیتین الی باغلانیر.
