بو گونلر آذربایجانین باشا باشیندا میللتیمیزین سئچیلمیش لرینین چوخلاری دوستاق لاردا دیلار، بو آذربایجان چیلار اؤز چالیشمالارینان میللی وارلیقلارینی قوروماق ایستهین اینسانلاردیلار. بو یولداشلارین آدلارینا باخدیقدا، ایشلرینی گؤردوکده بونلارین ندن ایچریده اولدوقلاری بیزیم اوچون مسئله یارالدیر. البت بیر سیرا یولداشلاریمیزی دا یاخیندان تانیمیریق و اونلارین ایشلرینی ائشیدیب گؤردوکده، فرحلنمک له ایله بیر اؤزگورلوک اینسانا ال وئریر. فرحلنمک بونا گؤرهکی آذربایجانین میللی حرکتینین فضاسیندا هئچ بیر تانینمیش جمعلری ایله ایلگیلی اولمادان بو درینلیکده آذربایجانچیلار یارانیبلار کی بونلار آزدا دئییرلر. بئله دییک کی ه میللی حرکتین چوخلوغونو یارادیرلار. منیم سؤزومو بو دلیل بسدیر کی گئچن ایل 20000 نفره یاخین توتولان آذربایجانچی لارین، تکجه 2000 نفره یاخین تانینمیشلاردان ایدیلار، قالانی حرکتین فضاسیندا یارانمیش آدالارین میللتچی لری ایدیلر. البت تانینان دئدیکده طبیعی اولاراق بیز بیر آز ساییدا، میللتچیلردن تانییا بیلهلریک آنجاق آذربایجانین بوتون شهرلرینده اولان میللتچی دوستلاریمیزدا اونلاری تانییا بیلمهیشدیلر. البت تحلیلچیلرگئچن ایل مای آیینین حادیثهلرینین بیر ایستیثنا ساییرلار کی بیردن آذربایجان میللتینین تاپدالانمیش حاقلارینین موقاویمت سسیندن یاراندی و بونا تای اولایلاری بیر ایستیثنا کیمی تاریخده گؤرمک اولار و اؤز تحلیللریمیزده بیز اونا اؤز فورموندا باخمالییق. بیزده بونلاری نظرده آلیریق، آنجاق کئچن ایل اولایلاریندان سونرا بیر سیرا توتولان یولداشلاردان، آغیر حوکم آلانلار اولدو، کی بو آغیر حوکم یئیهنلرین بیر سیرالاری تانینمامیش یولدوشلاردانی دیلار، بیر سیرالاریدا تانیدیغیمیز یولداشلاردانایدیلار کی بیزه بللی دیر بونلارا آغیر حوکم کسهجک لر، نییهکی بونلارین موقاویمتلری حاکمییتی سینسیتمیشدیر، موقاویمتلری چوخ مدنی بیر موقاویمتایدی کی اؤز میللی حاقلارینی گیزلهتمدن هر بیر تریبوندا ایستهمیشدیلر.
تانینمامیش آذربایجانچیلاردان کی توتولموشدولار آغیر حوکمه معروض قالانلاری چوخ اولدولار. بیز بونلارین نییه بو حوکملری یئدیکلرینی آراشدیراندا گؤرورک کی میللی حرکتده تانینمامیش یولداشلارین ایشلری او قدر دیرلی اولوب کی بیز اونلارین یانیندا اوتانیریق اؤزوموزه میللی فعال دئیهک.
بونلاردا ن بیریسی هادی حمیدی شفق دیر، 5 آلتی آی ایچریده اولاندان سونرا بللندی کی بئله بیر میللتچیده ایچریده ایدی. آزاد اولوب اولمامیش بیر داها توتولور گؤرهسن بو نه ایش گؤرور ، بیزه بللی دئییل، تکجه بیر آد تانییریق بو قدر. آذربایجانلی هئچ بیر گؤن راحات بوراخیلمامالیدیر ائله اونا گؤرهده دوستاقلار آذربایجانچیلارین یوللارین گؤزلهییر.
دوستاغا دوشن یولداشلاردان خبر وئریرلرکی، هادی حمیدی دوستاقدا بیر موقاویمت سیمگهسینه چئوریلیب، بارماقلاری سیندیریبلار یولوندان دؤنمهییب. دوستاقدا باشقا یولداشلارا اؤرهک وئریجی اولوب. هادیدان بیر فوتودا یوخوموزدور، بیز بو سئویملی رهبرلریمیزی تانییاق، میللی حرکتین اؤز ایچیندن دؤغولموش آذربایجان یولچولارینی تانیمالییق. هادی بیر آذربایجانچیدیر.
آذربایجاندا بیر کسلر وار کی اونلارین یاشاییشلاری میللی وارلیقلاری الده ائتمک اوچون چوخلو چتینلیک لریله اؤزلهشیر. آذربایجان یولوندا چالیشانلار هره سی بیر جور بو چتینلیکلره معروض قالیرلار آنجاق بعضیلرینین چتینلیکلری داها دوغروسو کدرلی اولور. بو گؤنلر ایچریده اولان یولداشلاردان بیریسی ده جاواد بی حسنپوردور، جاواد کئچن ایل مای آیینین اولایلاریندان سونرا، مجبوریت حالیندا عاییلوی چتینلیکلره گؤره مجبور اولدو اهر شهریندن چیخا و بیر مدت شخصی مسئلهلرین چؤزوتمک اوچون گیزلی قالا، بو گیزلی قالماق جاواد بیین چتینلیکلرینی آرتیردی، حایات یولداشینی بو ایسترسلر خستهلهییب خستهخانایا یوللاندیردی، اوشاقینی الدن وئردی. حایات یولداشی خستهخاندا اولاراق جاواد بی اونون یانیندا اولا بیلمهدی. اهرده ایش دورومو چتینلیکله معروض قالدی، هر نه ال اله وئردی جاوادی سیخماغا آنجاق هئچ نه جاواد بیی یولوندان دؤندرمهدی، اینفیعالا چکه بیلمهدی، ایندیده گؤروروک کی جاواد بی یئنیدن یاخالانیب. جاواد بی کیمی آذربایجانچیلارین یول گؤستریجیلیک لری له، آذربایجانین گلهجه یین دوغروسو آیدین گؤرولمهلیدیر.
بیزلر اوچون ایچریده اولان یولداشلاردان عبدلله بی جاوان تانینمیش بیر آددیر. عبدالله بی یونیورسیته اؤیرتمنی، معمار، یوخاری روتبهلی بیر دولت کارمندی دیر. هر بیر نفر بو یئرلره ال تاپماق اوچون بلکه بیر سیرا فیکیرلریندن ال چکه، آنجاق عبدالله بی بو موقعیتلری اؤزو اله گتیریب، او باجاریغیدا وار کی بوندان یاخشی مؤقعیتلره ال تاپا، بو موقعیتلر عبدالله بیی توتدوغو یولدان دالا چکدیره بیلمز. عبدالله بیی یاخیندان تانییانلار اونون هر نده صادق اولدوغونو و اونا ایمانی اولدوغونو دوشونوردو. عبدالله بئله دوشونوردو کی بیر آذربایجانچی آذربایجانا صادق اولمالیدیر، آذربایجانچیلارا صادق اولمالیدیر. اینسانلاری سعادتی عبدالله اوچون ان بویوک آرزیدیر. آذربایجانلی اینسانیندا سعادتی هر ندن چوخ اونو ماراقلاندیریر. عبدالله بیر آذربایجانچی کیمی دوشونور تکجه بیر آذربایجانچی کیمی.
بو گؤن سعید بی متینپور، جلیل غنیلو لا بیرلیکده یوز(100) گؤندن آرتیقدیر حبسه سالینیبلار، هئچ بیر دادگاهی اولونمادان، اونلارین آردیجا بهروز بی صفری ده دوستاقا سالیندی. حاکمیت اوچون بونلار یئترلی دئییل دیر آذربایجانین قیزیل بؤلگهسیندن، لیلا خانیم حیدری بهروز بیین خانیمی و علیرضا متینپور، سعیدین قارداشیدا دوستاغا یوللانمالی دیلار.
زنگان آذربایجانین مرکزی اولاراق حاکمیت طرفیندن 100 ایلدن بری آیری گؤستریلیر، آنجاق گؤروروک کی هر نه حاکمیت ایستهسه اولمایاجاق بلکه ترسی اولمالیدیر. زنگان آذربایجانین سیاسی مرکزینه چئوریلمهکده دیر، چئوریلیب بودا بیر گئرچک دیر. سعید بیی یاخیندان تانییان لار یاخشی تانییرلار کی سعید بی آذربایجانی دریندن دوشونوب و تام اولاراق بیر آذربایجانچیدیر. ساوادلی، دؤشونجهلی، ایناملی، دموکرات آزاد بیر اینسان. بیر آذربایجانچی اینسانین اولگوسو. حاکمیت فیکر ائلهییردی بلکه ائلییه بیلهجک سعیدی سیندیرا، سعیدی ائوین دوستاغیندا گؤرهنلراونون روحییهلی اؤلدوغونو و باشقالارینا اؤرهک وئردیینی، اینفیرادی سلولدا 67 گؤن اینفرادیده قالیب ایشکنجه اولاندان سونرا دئییردیلر. حاکمیت سعیدین اؤنونده سینمالیدیر. سعید هر بیر میللی موباریزه؛ موقاویمت، بیلگی، اینانج سیمبلیدیر. سعید بیر آذربایجانچی دیر.
یازدیقدا عابباس بی لیسانلی یازمییا بیلمیرهم، دوغروسو بودور کی عابباس بی بیزه آذربایجانی یازیر، بیر آذربایجانچی اولماغی گؤستریر، بیر آذربایجانچیکیمی داورانماقی اؤیرهدیر. نه یازسام عابباس بی اؤچون آزدیر.
ائلیاز بی یئکانلی ، صالیح بی کامرانی(میللی حرکتین موبارز وکیلی)، عابباس بی بنایی، شهناز خانیم غلامی، مسعود سلطانی و بیر چوخلو دوستلاریمیز بیر آذربایجانچی کیمی بیزه سالیق وئریجی دیرلر.
من اینانیرام کی آذربایجانین گلهجهیی آیدین بیرگلهجک اولاجاق و هئچ بیر یانیلدیجی جریاندا بو میللتی یولوندان آزدیرا بیلمهیهجک.