بیلمیرم سن ده منه گوللو جان

بو گونلر هر بیر یئردن بیر سس گلیر. کیمی سئویر، کیمی سئودیریر، کیمی سویوش فئستیوالین دا سویوشلرینی رئکلام ائله ییر. هر بوجاقدان بیر سس، دای بوجاقلارین ساییدا چوخالیب، تانیماق اولمور بو بوجاقلاردان هانسی بیزیمکی اولا بیلر. بیری سی قیرمیزی داراخ الده اوراخلاری دوغرویور. بیری سی بیر قایچی الینده پارچا بیچیر، بیری سی بویاق الده بویویور.

نه بیلیم بئله بیر دوران دا اولا بیلرمیش. بوجاقلاردا اوتورانلارا باخیرسان یاخشی آییرد ائلیه بیلمیرسن، بیری قارا چالیر، قارالیقدا ساریشینلاشیر. ساری شین، قاراشین، اسمر کیم سئوه بیلمز. هره سینین بیر دادی وار. بیزیم ماراغیمیزدا دئییشیلیب. اؤزوموزدن باشقا هر نه یه ماراق گؤرمک اولور. بیلیرسن آدام قالیر. هر کیم گؤرورسن ائله اؤزونو بیزدن بیلیندیریر کی سن باشقا جور دوشونمه یی ساتقینلیق باشا دوشورسن. صداقت دئییرسن یاغیر. هر کیم حاقلی دیر، اونون قاباغیندا اولانلار ایسه ساتقین. بو دومانلیق دا سن ایکی سین بیه ننده اونلار دینج اوتورمازلار، بوجاق تاپانمازلار،  اونلارا دا بوجاق دوزلدرلر، سنی ده بوجاغا قویمازلار. قالارسان بوجاق سیز، آی سیز، اولدوزسوز.

هر کس آتی نی باشاریر اوینادا سن ده آت بیلمیسن نه دیر. کیمی دوشونورسن دینمه دن ده، او ساری گلینی، یوخسا اسمر قیزی، کیمی، بلکه ده سن بیری نی سئومک باشارمیسان. واللاه نه بیلیم ساری گلینی سئونلر، فیدل ساغلیغینا شوشه لری قوزاییب، اسپاناتاکرت ساغلیغینا بوشالدیرلار. کیمسه سئومه سه ده اوره یی داش، قلبی قره بیری سی. پست مدرنلیی وولگادان کیروف آباد آراسیندا گؤرمک اولار. بیزده هله ده گنجه دن فایتین گلیر. نه قدر گئرییه قالمیش منم.

اسمر قیزی سئونلر، گون به گون اسمرلشیرلر، کیم سئوه بیلمز تیتره ک میناری، کیم سئوه بیلمز قاراقاش، اوزوقاراشین انشانی. بیلیرسیز تهمینه ساغلیغینا قالدیرا بیلمه ینلر، اینان کی نامازا دورا بیلمزلر.

بو قارما قاریشیق دا سن ده هردن مئیدانا گیرمک گؤیلونا دوشنده ائله اورتادا اولورسان، هر توپ گلنده سن توشلانیرسان، آخ نئجه ده یاپیشیر توپلار. ها چیغیر من اؤزومه اوینویورام. باش قووزادیقدا مئیدانداسان. توشلوجاق اولماق دا یاخشی اولور. قارا گونه قالمیشام یوخسا سارالمیشام. بیلمیرم سن ده منه گوللو جان.