ایل دولانیر گونلر بیر بیر اؤتور. منطقه ده گئدن گئدیشات سورعت آلیر. بوتون قودرت صاحابلاری گوجلرینی بیر یئره توپلاییرلار. هر کس بو دیدیشمه لردن پای آلماق ایسته ییر. کیمنن پای آلماق! او کس کی ضعیف دیر مجبوریت دوروموندا قالیب هر نه یین الدن وئره بیلر. دونن عاراقدا تورکمانلار پای لارین وئردیلر اؤزگه لره. تورکیه ده دوروب باخدی بلکه ده اؤزو ایته دی تورکمان لار تاپدالانسین لار. تورکیه ده کیملیک داواسی هله ده دین دن مذهبدن آیریلماییب. گئرچک لر دوشونورمورلر. ندن لی یه وریانی سویا وئردیک لریندن آسیلی دیر. ائله بو گون ده تورکیه موطلق گونئی آذربایجان آدیلا موخالیف دیر و قوزئی آذربایجان دا هله چوخ قالیر سیاست اوینویا بیله. گونئی ده گئدن حرکات دا اینسیجام لاشا بیلمیر. اؤرگوت لر اؤز روللارینی اوینایا بیلمیر لر. بلکه ده اومودلری وار هئچ نه یئریندن ترپنمه یه جک و اوزون سوره لی موباریزه آدینا اؤزوموزو مشغول ائله یه جه ییک.
هئچ بیر یئره یئتمه دن دیکتاتور باخیشلار یاغدیریلیر. هر نه یی تشکیلاتلارا گؤره. آذربایجاندا دا منافع میللی شخص لرله تعریف له نیلیر.
نه بیلیم بلکه دوغروسو. بودور و بیزده چابالامادان آللاهین موقددراتینا باش ایمه لی ییک.
آذربایجانین بوتونلویو تاریخی سبب لره گؤره ایللر بویو ایستیبدادلا اوز به اوز اولوب، بوتون زامانلاردا بوردا قورولان دولتلر دیکتاتورلوقدان یارارلانیبلار، هر بیر دورهده دیکتاتورلوقو مملکتین مصلحتی بیلیبلر. البت بو تکجه آذربایجان اوچون یوخ بلکه شرقی مملکتلرین، یئرلرین هامیسیندا اوز وئریر. آذربایجانین بیر فرقی باشقا شرقی اولکهلرینن وار اودا بو کی تاریخین بوتون دورلرینده آذربایجاندا، اینترناسیونال دوشونجهسینی اورتایا قویان چوخلو دئو شخصیتلر دونیایا یایلیبلار. آنجاق بو شخصلرین دوشونجهلری دموکوراسی گؤروشوله یوخ بلکه بیر عیرفانی، آتئیزمی دستکلهین دوشونجهلر اولوب و یئری گلدیکده آذربایجانین کیملیینه تهلوکهلی اولوبلار.
آذربایجانلی کؤکنلی کیمسهلر ایمپراطورلوقلار قوروبلار. هئچ زامان آذربایجان آدینا دولتلرینی قورمویوبلار، ائله اونا گؤرهده آذربایجان میللتینین سیمگهسینه چئوریلمهییبلر. آذربایجان آدینا ساواشان کیمسهلر آذربایجانین بوتونلویونده تاریخ بویو سئویلیبلر.
آذربایجان ژئوپولیتیک باخیمیمندان دونیانین چاخناییشلی یئرلریندن بیری اولوب. بونا دایاناراق آذربایجانا ایسیترایستهمز چوخلو باسقیلار اولوب. بو باسقیلاردان تاریخ بویو آذربایجانین باشی آینامی ییب.
آذربایجان ایللر بویو باسقی آلتیندا اولدوغونا گؤره ایستیبداد سئور روحیه بلکهده بو میللته سیزیب. هئچ بیرکیمسهنی قیناماق اولماز، نییه کی ژئوپولیتیک دورومو بو ایشلری قاباغا گتیریب. هانتینگتونون دئدییی تمدونلر ساواشینین چاتیشقاسیندا یئرلشن تاریخی آذربایجان تاریخ سورهسینده دوشونجهلرین ساواش نوقطهسی اولوب. ائله اونا گؤرهدیر کی هر یولدان گئچن آذربایجانی ایسارت آلتینا آپارماق ایستهییر. بوردا آذربایجانین دوشونورلرینین گؤرهویدیر کی آذربایجانین سعادتینی قورویالار.
ایندییهدک آذربایجانین میللی منفعتی آیدینجاسینا تعریفلهنمهییب. آذربایجانین میللی منفعتی نهدئمکدیر. آذربایجان میللتینی بیر شرق میللتیکیمی(قضا و قدره باغلی، حیس عاقلا غلبه چالان) ساخلایاق یا دا کی گلیشمیش بیر میللته چئویرهک. دونیادا اولان بیلگیلردن فایدالاناق، گؤندمده اولان دوشونجهلریایله میللتیمیزی تعریفلهییب، یونهلدک. گئری قالمیش دوشونجهلریایله میللی منافعی تعریفلهمک، میللتی او تعریفلرله یؤنهتمک اولا بیلسین اوزون سورهده میللتین ضررینه قورتولا. آذربایجانین تاریخینده اولان، حاکیملرهامیسی شوعاردا آذربایجانین میللی منافعینن قوروماغی دوشونوبلر آنجاق هر زامان بو میللی منافعی ایدئولوژیلره قوربان وئریبلر. تاریخ بویو آذربایجانی اؤزو اوچون دوشونن کیمسهلر بارماق ساییسیندان آز اولوب، هئچ زامان بو آخین یارانماییب. آنجاق بو گونکو دونیادا بیلگیلرین آرتماسی، چوخ راحات الده ائدیلمهسی گنجلرین ایچینده بو آخینی یارالدیب. گنجلرین هئچ بیریسی آذربایجانی بیر کسین منفعتی اوچون تعریفلهمیییبلر، بلکه آذربایجان بوتونلوکله بو میللت اوچون تعریفلهییبلر.
اینسانی اینسان ائدن، اینسانی اینسان کیمی یاشادان، دوشونجه لری اولا بیلر. بیز بو گون دوشونوروک دییه یاشاماقا ایمکانیمیزدا وار. البت هر کیمسه دوشونه بیلر آنجاق اوزگور دوشونمک، اؤزونوموزو بیر میللت کیمی دوشونمک بیزی بیر میللت کیمی یاشاتماقدادیر. اؤنملی شئی کی بو گون منی بیر میللت کیمی تانیتدیرماقدادیر همن من آذربایجانلینین اؤزگور دوشونجه سیندن آسیلی دیر. بیز او زامان کی دوشوندوک بیر اوزگور میللت کیمی، هئچ بیر گوج بیزیم میللت اولدوغوموزون قارشی سینی آلا بیلمز.
بوتون اینسانلارین یاشام فلسفه لرینده اؤزگورلویو گؤرمک اولا بیلر. منده بیزده سیزده، هر بیر اینسان دئییلن بیر کیمسه نین اؤزگور دوشونمه یه حاققی وار. ائله بو سببدن بیز بو گون هر نه یی باغیمسیز دوشونوروک و هر کیمسه نین ده باغیمسیز اولدوغون دوشونوروک.
اینسانین باغیمسیزلیغی بو گون یوخ بلکه اینسان آدینا تاریخ ده ایز قویدوغو زاماندان باشلانیلیر. تاریخ بویو باغیمسیز دوشونن اینسانلار سئویلیب و آدلاری قالیب دی. دونیادا اوزگورلویه چالیشان اینسان لارین دوشونجه لری ایز قویوجو اولوبدور. دینی عالیم لردن توتوب یئنی فیلسوف لارا تک اینسان لارین سعادتینه چالیشماقی باغیریب لار. آنجاق چئشیدلی دوشونجه لری اورتایا گتیریب لر. بو کس لرین بیر اورتاق لیق لاری واردیر اودا بو کی اوزلری اوزلرینه اوزگور دوشونوب لر آنجاق اولا بیلسین کی اوزگه لره اوزگور دوشونمه سینلر.